Estelas
Dins
las nuèches davali
De fòc cremada soi
Mossegada freja de las nuèches ermassidas
Dins la tenèbra davali
Que me trauca l'esquina l'uèlh de cròsa
Al sòl lo crètge soi
De la plaga tornada tampar la sagnadura viva
Pòts
de mèlas afustats
Dins lo murtre del jorn davali
Sul frònt del cèl desplegui las velas de terra
M'engulis la negrura
E mai s'amudis lo messatge
Trabuca l'anada jol vam alentit
Estelas
ont sètz vosautres ?
Arpian
las visions de la lamiòla las lucas
De longa de la revelacion la pudesina esperi
Dels cadavres la santa redoléncia
Mas cap a tu davali
De las soscadas negrura
E los mieus rens lo freg engulis
Per
la boca mia se tampan lo cuol las farfantelas
Subre la terra se trencan las onglas dels aprendissatges
De freja terra claufida soi
Sens acabada es la davalada
Mai glaçat que la messorga es del ventre lo còr
E se son dissòlgudas las piadas
Detadas
ont sètz vosautres ?
Jos
l'astre dels tombèls nuda soi
E clapan los mieus òsses jos la quichada
De solesa los vèrses aculhissi
Del enguliment las dents englandadas
Mas plòu d'esglasi lo mieu còrs sus las pèiras
Totjorn
mai debàs los cadèls espotits son
S'enauran las ronhas jos las redolencias
Dins las crostàsses davali
Que fan bescòr las bafiòlas dels rulles falses cagals
Dels membres la popa esquinçada
Las esventracions
Lagremas
ont sètz vosautres ?
Res
mai respond pas dins la carn
E de las lodas lo silenci
Davalar
tant prigond que ne sera taravelada la nuèch
Davalar al cròs de las cachavièlhas
Davalar lo còrs al fons del traucàs
Cremar de freg dins la perversa tombada
Estelas
ont
Sètz
Vosautres
?
|